सांगोला / नाना हालंगडे
ट्रॅक्टर अपघातात मरण पावलेल्या शिरभावी येथील रोहित बोडरे याच्या कुटुंबाचा उदरनिर्वाह चालावा यासाठी आपुलकी प्रतिष्ठानच्यावतीने बोडरे कुटुंबियांस दिवाळीची भेट म्हणून एक शेळी घेवून देण्यात आली.
3 सप्टेंबर 2021 रोजी ट्रॅक्टर अपघातात शिरभावी येथील रोहित आक्रेशन बोडरे या युवकाचा मृत्यू झाला होता. त्याच्या कुटुंबियांची भेट घेवून आपुलकी प्रतिष्ठानने आपुलकी दाखवत 6 महिन्यांचा किराणा माल व दरमहिना 2 हजार रुपये मदत देण्याचे ठरविले.
त्यानुसार किराणा माल पोहोच केला जात आहे. मात्र उदरनिर्वाहाचा प्रश्न बऱ्यापैकी मार्गी लागावा म्हणून रोहित बोडरे याची आई मिनाताई बोडरे यांना शेळीपालनासाठी शेळी घेवून देण्याचा निर्णय आपुलकी प्रतिष्ठानच्या बैठकीत घेण्यात आला होता. यासाठी आपुलकी प्रतिष्ठानच्या सदस्यांनी देणगी देवून सहकार्य केले.
जमा झालेल्या या देणगीतून मंगळवार (दि.26) रोजी त्यांना दोन पाटी असलेली शेळी घेवून देण्यात आली. गरीबाची म्हैस म्हणून शेळी ओळखली जाते. शेळीपालनातून चांगले उत्पन्न मिळू शकते व एका शेळीपासून शेळीपालनाची चांगली सुरवात होवू शकते म्हणून ही मदत करण्यात आली.
“शेळीची ही मदत माझ्या कुटुंबाच्या उदरनिर्वाहासाठी खूप मोलाची आहे, आपुलकी प्रतिष्ठानने आपल्या कुटुंबाला मोठा आधार देवून दु:ख हलके करण्याचा प्रयत्न केला आहे, अशी भावना यावेळी मिनाताई बोडरे यानी व्यक्त केली”.
शेळी व दोन पाटी सुपुर्त करताना आपुलकी प्रतिष्ठानचे अध्यक्ष राजेंद्र यादव, खजिनदार शरणप्पा हळ्ळीसागर, कार्यकारिणी सदस्य अरविंद केदार, हरीभाऊ जगताप यांचेसह शहाजी घाडगे सर व इतर मान्यवर उपस्थित होते.
