सांगोला तालुक्यात पहिल्याच दिवशी ११ हजार ५४८ विद्यार्थ्यांची उपस्थिती
पहिली ते चौथीच्या शाळा सुरू; १० हजार ३७२ विद्यार्थ्यांची दांडी
सांगोला / नाना हालंगडे
तब्बल 20 महिन्यानंतर राज्य सरकारच्या आदेशाने पहिली ते चौथीचे वर्ग सुरू करण्यात आले असून आज 1 डिसेंबर रोजी पहिल्याच दिवशी 11 हजार 548 विद्यार्थ्यांनी हजेरी लावली. यामुळे तालुक्यात आनंददायी शिक्षणाला सुरुवात झाली असून,मुलांमध्ये विशेष असा उत्साह पहावयास मिळाला.
कोरोना महामारीमुळे मागील 20 महिन्यापासून शाळा बंदच होत्या. 5 ते 12 पर्यंतचे वर्ग काही महिन्यापूर्वी सुरू करण्यात आले होते ,पण 1 ते 4 चे वर्ग सुरू केले नव्हते. कोरोना संसर्ग कमी झाल्याने राज्य शासनाने मागील काही दिवसापूर्वी आदेश काढले होते.
त्याअनुषंगाने 1 डिसेंबरपासून सांगोला तालुक्यात शाळा सुरू झाल्या. तालुक्यात 389 जिल्हा परिषदेच्या शाळा असून 1 ते 4 चे 21 हजार 920 इतके विद्यार्थी असून काल 11 हजार 548 इतके विद्यार्थी पहिल्याच दिवशी हजर होते.
तब्बल 20 महिन्यानंतर शाळा सुरू झाल्याने शिक्षक,पालक आणि विद्यार्थ्यांमध्ये विशेष असा उत्साह दिसत होता. अनेक शाळांमध्ये विद्यार्थ्यांचे स्वागत करण्यात आले.
पहिल्याच दिवशी तालुक्यातील सर्वच गावामध्ये माजी वसुंधरा अभियाना अंतर्गत गावामध्ये प्रभात फेरी काढण्यात आली.
